என் ஆற்றலாகிய ஆண்டவரே! உம்மிடம் நான் அன்புகூர்கின்றேன். ஆண்டவர் என் கற்பாறை; என் கோட்டை; என் மீட்பர்; என் இறைவன்; நான் புகலிடம் தேடும் மலை அவரே; என் கேடயம், எனக்கு மீட்பளிக்கும்  வல்லமை,  என்  அரண்.  போற்றற்குரிய  ஆண்டவரை  நோக்கி  நான்  மன்றாடினேன்;  என்  எதிரிகளிடமிருந்து  நான்  மீட்கப்பட்டேன்.  சாவின்  கயிறுகள்  என்னை  இறுக்கின;  அழிவின்  சுழல்கள்  என்னை  மூழ்கடித்தன.  பாதாளக்  கயிறுகள்  என்னைச்  சுற்றி  இறுக்கின;  சாவின்  கண்ணிகள்  என்னைச்  சிக்க  வைத்தன.  என்  நெருக்கடிவேளையில்  நான்  ஆண்டவரிடம் மன்றாடினேன்; என் கடவுளை நோக்கிக் கதறினேன்; தமது கோவிலினின்று அவர் என் குரலைக் கேட்டார்; என் கதறல் அவர் செவிகளுக்கு எட்டியது.  திருப்பாடல்கள் 18: 1-6

ஏழைகளுக்கு மிகத்தாராளத்தோடு ஆற்றப்படும் அன்புப்பணியின் வழியாக மட்டுமே, கிறிஸ்துவில் நம் உரிமை வாழ்வு வளரும் மற்றும், கனிதரமுடியும் எனவும், புனித பவுல் நமக்குச் சொல்கிறார். இயேசு, தம் பாடுகள், மற்றும், மரணத்திற்கு முந்திய நாளில், தம் சீடர்களோடு இறுதி இரவு உணவு அருந்தியபோது, தன்னலமற்ற அன்பு வாழ்வுக்கு எடுத்துக்காட்டாய் விளங்கினார். அவர் அந்நிகழ்வில் தம் சீடர்களின் பாதங்களைக் கழுவினார். அவ்வாறே நாமும் செயல்படவேண்டுமென்று அவர் போதிக்கிறார். கிறிஸ்தவ உரிமை வாழ்வு, முக்கிய சமுதாய அம்சங்களையும் கொண்டிருக்கின்றது. தற்போதைய பெருந்தொற்றின் பாதிப்புக்கள், உரிமை வாழ்வின், தான் என்ற தன்னலக் கருத்தியலைக் குறைத்து, ஆழமான குழும உணர்வைக் கண்டுணர அழைப்புவிடுக்கிறது.         

 

திருத்தந்தை  பிரான்சிஸ்

அருட்டந்தை அன்ரன் றஞ்சிற் பிள்ளைநாயகம்

கொழும்பு உயர் மறைமாவட்டத்தின் புதிய துணை ஆயர்

கத்தோலிக்க திரு அவையின் தலைமை ஆயர் திருத்தந்தை பிரான்சிஸ் அவர்கள் இலங்கை, கொழும்பு உயர் மறைமாவட்டத்தின் புதிய துணை ஆயராக அருட்டிரு அன்ரன் றஞ்சிற் பிள்ளைநாயகம் அவர்களை கடந்த 13-07-2020 அன்று நியமித்தார்.

1966ம் ஆண்டு புரட்டாதி 23ம் நாள் யாழ்ப்பாணத்தில் பிறந்த அன்ரன் றஞ்சிற் அவர்கள் தம் ஆரம்ப, இடைநிலைக்கல்வியை கொழும்பிலும், உயர்கல்வியை யாழ். சம்பத்தரிசியார் கல்லூரியிலும், விஞ்ஞானப் பட்டப்படிப்பை யாழ் பல்கலைக் கழகத்திலும் நிறைவுசெய்தார். 

தாயகத் திருஅவை

1505ம் ஆண்டில் போர்துக்கீசரின் வருகையோடு இலங்கைத் தீவில் கத்தோலிக்கம் நிலைகொள்ளத் தொடங்கியது. 1544ல் யாழ் மன்னன் தன் ஆளுகைக்குற்பட்ட பகுதியில் கிறிஸ்தவம் வேரூன்றுவதை வெறுத்தான். மன்னார்ப் பகுதியில் புதிதாக கத்தோலிக்க மதத்தைத் தழுவிக்கொண்ட சுமார் 600 பேரை வாளுக்கிரையாக்கி கத்தோலிக்கத்தை அழிக்க முனைந்தான். ஆனால் மறைசாட்சியரின் இரத்தம் திருஅவையின் வித்தாகியது. 

17ம் நூற்றாண்டின் ஒல்லாந்தரின் ஆட்சிக்காலத்தில் (1640-1796) கத்தோலிக்க திருச்சபை மீண்டும் பெரும் நெருக்கடிக்குள்ளானது. ஒல்லாந்து பிரிவினைவாத அதிகாரிகளினால் கத்தோலிக்க குருக்களில் சிலர் துன்புறுத்தப்பட்டனர் ஏனையோர் துரத்தியடிக்கப்பட்டனர். கத்தோலிக்க குருக்களின்மையால் களையிழந்த தளத்திருஅவையைக் காப்பதில் (புனித) ஜோசப் வாஸ் என்னும் இந்திய குருவின் வருகை (1686) பெரும்பங்காற்றியது.

பின்பு ஆங்கிலேயார் காலத்தில் (1815-1948)கிடைக்கப்பெற்றஎல்லா மதங்களுக்குமான மதச்சுதந்திரத்தோடு இலங்கைத்தீவில் பணியாற்ற வந்திறங்கிய (1848) அமல மரித்தியாகி (omi) குருக்களின் காலத்தோடு இலங்கைத் திருஅவை பெரும்வளர்ச்சி காணஆரம்பித்தது.


தற்போது 12 மறைமாவட்டங்களாப் பிரிக்கப்பட்டு இலங்கைத் திருஅவை தீவு முழுவதிலும் பணியாற்றி வருகிறது. இலங்கையின் மொத்த சனத்தொகையில் 6.1 கத்தோலிக்கரைக் கொண்ட (121194 கத்தோலிக்கர் – 2012ன் சனத்தொகை மதிப்பின்படி) இலங்கைத் திருஅவையில் யாழ்ப்பாண மறைமாவட்டம், திருகோணமலை மறைமாவட்டம், மன்னார் மறைமாவட்டம், மட்டக்களப்பு மறைமாவட்டம் போன்றன தமிழ் கத்தோலிகர் செறிந்துவாழும் இடங்களாக இருக்கின்றன. கொழும்பு உயர் மறைமாவட்டத்தின் ஆயராக கர்தினால் அதிமேன்மைதங்கிய மல்கம் கார்டினல் றஞ்சித் அவர்கள் பணியாற்றிவருகிறார்கள்.

யாழ்ப்பாண மறைமாவட்டத்தில் ஆதிவந்தனைக்குரிய ஆயர் ஜஸ்ரின் ஞானப்பிரகாசம் ஆண்டகையின் ஆயத்துவத்தில் 60 பங்குகளில் சுமார் 253000 கத்தோலிக்கருக்குப் பணியாற்ற 172 குருக்களும் 96 ஆண்துறவிகளும்  251 பெண்துறவிகளும் இறைபணிபுரிகிறார்கள். அதுபோல திருகோணமலை மறைமாவட்டத்தில் ஆதிவந்தனைக்குரிய ஆயர் நோயல் இம்மானுவேல் ஆண்டகையின் ஆயத்துவத்தில் 13 பங்குகளில் சுமார் 25000 கத்தோலிக்கருக்குப் பணியாற்ற 27 குருக்களும் 19 ஆண்துறவிகளும் 30 பெண்துறவிகளும் இறைபணிபுரிகிறார்கள். அடுத்ததாக மன்னார் மறைமாவட்டத்தில் ஆதிவந்தனைக்குரிய ஆயர் இம்மானுவேல் பெர்ணாண்டோ ஆண்டகையின் ஆயத்துவத்தில் 39 பங்குகளில் சுமார் 85000 கத்தோலிக்கருக்குப் பணியாற்ற 100 குருக்களும் 54 ஆண்துறவிகளும் 188 பெண்துறவிகளும் இறைபணிபுரிகிறார்கள். மேலும் மட்டக்களப்பு மறைமாவட்டத்தில் ஆதிவந்தனைக்குரிய ஆயர் ஜோசப் பொன்னையா ஆண்டகையின் ஆயத்துவத்தில் 25 பங்குகளில் சுமார் 42000 கத்தோலிக்கருக்குப் பணியாற்ற 48 குருக்களும் 28 ஆண்துறவிகளும் 67 பெண்துறவிகளும் இறைபணிபுரிகிறார்கள்.

இலங்கையின் அப்போதலர் என அழைக்கப்படும் புனித ஜோசப் வாஸ் அடிகளாரின் காலத்திற்கு முன்பாகவே ஒல்லாந்து பிரிவினைவாதிகளின் நெருக்கடிகளுக்குப் பயந்து மாதோட்டக் காட்டுப்பகுதியில் தஞ்சம்கொண்ட மாந்தைப்பகுதி கத்தோலிக்கர் தம்மோடு எடுத்துச்சென்ற அன்னைமரியின் திருச்சுருபத்தை மடு என்னும் காட்டுப்குதியில் சிறுகுடிசையொன்றில் ஸ்தாபித்துக்கொண்டனர் (1670). இதுவே இன்று இலங்கைத்தீவின் கத்தோலிக்க அடையாளமென எழுந்து நிற்கும் மருதமடுத் திருத்தலமாகும்.

Go to top
Template by JoomlaShine