என் ஆற்றலாகிய ஆண்டவரே! உம்மிடம் நான் அன்புகூர்கின்றேன். ஆண்டவர் என் கற்பாறை; என் கோட்டை; என் மீட்பர்; என் இறைவன்; நான் புகலிடம் தேடும் மலை அவரே; என் கேடயம், எனக்கு மீட்பளிக்கும்  வல்லமை,  என்  அரண்.  போற்றற்குரிய  ஆண்டவரை  நோக்கி  நான்  மன்றாடினேன்;  என்  எதிரிகளிடமிருந்து  நான்  மீட்கப்பட்டேன்.  சாவின்  கயிறுகள்  என்னை  இறுக்கின;  அழிவின்  சுழல்கள்  என்னை  மூழ்கடித்தன.  பாதாளக்  கயிறுகள்  என்னைச்  சுற்றி  இறுக்கின;  சாவின்  கண்ணிகள்  என்னைச்  சிக்க  வைத்தன.  என்  நெருக்கடிவேளையில்  நான்  ஆண்டவரிடம் மன்றாடினேன்; என் கடவுளை நோக்கிக் கதறினேன்; தமது கோவிலினின்று அவர் என் குரலைக் கேட்டார்; என் கதறல் அவர் செவிகளுக்கு எட்டியது.  திருப்பாடல்கள் 18: 1-6

ஏழைகளுக்கு மிகத்தாராளத்தோடு ஆற்றப்படும் அன்புப்பணியின் வழியாக மட்டுமே, கிறிஸ்துவில் நம் உரிமை வாழ்வு வளரும் மற்றும், கனிதரமுடியும் எனவும், புனித பவுல் நமக்குச் சொல்கிறார். இயேசு, தம் பாடுகள், மற்றும், மரணத்திற்கு முந்திய நாளில், தம் சீடர்களோடு இறுதி இரவு உணவு அருந்தியபோது, தன்னலமற்ற அன்பு வாழ்வுக்கு எடுத்துக்காட்டாய் விளங்கினார். அவர் அந்நிகழ்வில் தம் சீடர்களின் பாதங்களைக் கழுவினார். அவ்வாறே நாமும் செயல்படவேண்டுமென்று அவர் போதிக்கிறார். கிறிஸ்தவ உரிமை வாழ்வு, முக்கிய சமுதாய அம்சங்களையும் கொண்டிருக்கின்றது. தற்போதைய பெருந்தொற்றின் பாதிப்புக்கள், உரிமை வாழ்வின், தான் என்ற தன்னலக் கருத்தியலைக் குறைத்து, ஆழமான குழும உணர்வைக் கண்டுணர அழைப்புவிடுக்கிறது.         

 

திருத்தந்தை  பிரான்சிஸ்

நோர்வேயில் முதல் தமிழ் குரு அருள்பணியாளர் பிராங்ளின் பெர்ணாண்டோ     குருத்துவ அருள்பொழிவும் முதல் திருப்பலியும்


2020ம் ஆண்டு ஜூன் 20ம் நாள் நோர்வே தளத்திரு அவை வரலாற்றில் இன்னுமொரு முக்கிய நாளாகும். அருட்சகோதரர் பிராங்ளின் பெர்ணாண்டோ அவர்கள் ஒஸ்லோ மறைமாவட்ட ஆயர் மேதகு பேர்ண்ற் ஐட்ஸ்விக் (Bernt Eidsvig) அவர்களால் ஒஸ்லோ புனித யோவான் ஆலயத்தில் அருள்பணியாளராக குருத்துவ அருள்பொழிவு செய்யப்பட்டார்.

நோர்வே கத்தோலிக்க திருச்சபை

சுமார் ஆயிரம் ஆண்டுகளுக்கு முன் கத்தோலிக்க விசுவாசம் நோர்வே மண்ணில் நிலைகொண்டது. புனித ஊளாவ் (St Olav) என்னும் நோர்வேஜிய மன்னன் கத்தோலிக்க மறையைப் பரப்ப தம் உயிரையும் ஈந்தார். பின்பு மத்தியகாலத்தில் எழுந்த  பிரிவினைச் சபையின் நெருக்குவாரத்தினால் நோர்வே கத்தோலிக்க திருச்சபை களையிழந்தது.
இருபதாம் நூற்றாண்டின் இறுதி தாசப்தங்களிலும் தொடர்ந்த 2000ம் ஆண்டையடுத்த  காலத்திலும் நோர்வேயை நோக்கிப் புலம்பெயர்ந்த கணிசமான கத்தோலிக்கரின் வருகையைத் தொடர்ந்தும் நோர்வே கத்தோலிக்க திருச்சபை புதுவடிவம் பெறுகிறது.
நோர்வே கத்தோலிக்க திருச்சபை முறையே, ஒஸ்லோ (Oslo), ட்றொம்சோ (Tromsø), ட்றொண்ட்ஹைய்ம்(Trondheim) என மூன்று நிர்வாக மறையலகுகளாகப் பிரிக்கப்பட்டிருக்கிறது. இவற்றுள் சுமார் 150000 கத்தோலிக்கரைக் கொண்டிருக்கும் ஒஸ்லோ மறைமாவட்டம் அதி வந்தனைக்குரிய ஆயர் பேர்ண்ற் ஐட்ஸ்விக் (Bernt Eidsvig) ஆண்டகை அவர்களின் ஆயத்துவத்தில் வளர்ந்து வருகின்றது. மொத்தம் 28 பங்குப் பணித்தளங்களாகப் பிரிக்கப்பட்டுள்ள ஒஸ்லோ மறைமாவட்டத்தில் ஆயரவர்களோடு இணைந்து சுமார் 70 குருக்களும், 25இற்கு மேற்பட்ட துறவற சபைகளைச் சேர்ந்த ஆண், பெண் துறவிகளும் இன்னும் நூற்றிற்கு மேற்பட்ட பொது நிலைப்பணியாளர்களும் ஆர்வமாய்ப் பணிபுரிகின்றனர்.

 

Go to top
Template by JoomlaShine